Ganed Bombino (ei enw genedigol yw Goumour Almoctar, a chaiff hefyd ei alw’n Oumara Moctar) ym 1980 yn y gwersyll Twareg crwydrol, Tidene, tu allan i Agadez, Niger, a daeth i oed yn ystod cynnwrf gwleidyddol, a bu’n rhaid iddo ffoi gyda’i deulu i Algeria erbyn 1990, cyn dysgu canu gitâr drwy wylio fideos o’i arwyr Jimi Hendrix, Dire Straits, Ali Farka Toure a Tinariwen. 

Roedd ei record gyntaf, Agadez, yn arddangos llais cyfareddol, rhythmau atgofus a hypnotig, a gitâr syfrdanol, a chafodd ei henwi’n un o ddarganfyddiadau gorau’r flwyddyn gan NPR. Fe wnaeth ei ail albwm, Nomad, yn 2013, a recordiwyd gyda Dan Auerbach o The Black Keys, sefydlu Bombino fel seren ar lwyfan y byd ac un o gitaryddion gorau’r byd. 

Bombino greodd y genre newydd 'Tuareggae' - sy’n gyfuniad o gitâr Twareg a rhythm reggae - a chafodd ei enwi gan y New York Times fel 'The Sultan of Shred', ac yn 2018 fe oedd yr artist cyntaf erioed o Niger i gael ei enwebu am Grammy (Albwm Orau Cerddoriaeth y Byd). Mae ei waith diweddaraf o 2023, Sahel, yn galw am undod yn rhanbarth Sahel ac mae’n cynnwys ystod o berfformiadau, o faledi acwstig i draciau gitâr drydan cyflym.  

Er gwaetha’r heriau mae bywyd yn eu taflu ato, mae Bombino’n bwrw ati ar ei ymgyrch i ddefnyddio cerddoriaeth i ledaenu cariad, dealltwriaeth, a harddwch diwylliant Twareg ledled y byd, ac rydyn ni’n falch iawn o’i groesawu i Llais. 

Mwy gan Bombino